Pinagsugo ni U.S. President Donald Trump kan nakalihis na Biyernes an pagpapatalsik sa economic official kaining si Erika McEntarfer, Commissioner of Labor Statistics huli man sa mga akusasyong minamanipula soboot kaini an mga datos kan mga trabaho sa nasyon, obhetong isinaladawan kan Presidente kan Amerika komo pamomolitika sa saiyang administrasyon.
An paghahali sa U.S official an kasunod kan sarong report na nagpapahiling kan pagbaba kan job market sa nasyon.
Bagay na dae man nagustuhan ni Trump asin sinabing pineke soboot ini tangani magluwas na maraot siya asin an Republicans susog pa sa saiyang nagin post sa saiyang social media.
Sigun kaya sa pinakabagong datos gikan man sa Department of Labor kan nasyon, an pagdakol nin mga trabaho kan nakalihis na Hulyo an mas hababa kumparar sa nilalaoman, na may 73,000 sana na mga trabaho an nadagdag.
An mga naenot na report para sa bulan nin Mayo asin Hunyo an nire-vise man pababa, na nagpahiling kan pinakahababang antas kan paglago kan trabaho magpuon kan COVID-19 pandemic.
Sa ibong man kaini, binatikos man kan mga kritiko ni Trump an pagpapatalsik sa economic official kun saen ikinahadit ninda an pag-pagpapahali ki McEntarfer na nagpapahiling nin maraot na halimbawa kan pagigin ”authoritarian countries” kan Estados Unidos asin man bakong pagigin sarong ”democratic” na nasyon.
Sigun man ki Larry Summers dating U.S. Treasury secretary na under ng democratic president na si Bill Clinton, an pagpahali sa head kan key government agency huli sana sa dae nagustuhan na numero kan saindang report, na gikan sa mga survey gamit mga established procedures, an nangyayari sa mga authoritarian countries.
Kinondena man kan National Association for Business Economics (NABE) an pagpahali ki McEntarfer asin pigtawan duon an mga pagbabago sa mga numero kan trabaho an parte sana man kan mga hamon na kinakaatubang kan mga ahensya sa gobyerno siring kan Bureau of Labor Statistics.
Mientrastanto, padagos man na naglalaom an Federal Reserve na magsagibo nin mga bagong lakdang an gobyerno tangani masimbagan an pagluya kan ekonomiya, mantang nagpapadagos an mga taripa asin iba pang hamon sa ekonomiya kan nasyon.
