Patagong ibinalyo hale si President Donald Trump kan Estados Unidos sa Air Force One pasiring sa mas sadit na eroplanong militar mantang yaon sa Turkey (Turkiye)kan nakaaging bulan, makalihis na makatanggap nin mga pananakot sa saiyang buhay.
Sinabi ni Trump na an U.S. Secret Service nagsugo saiya na magbalyo nin eroplano pagkatapos kan NATO summit sa Ankara.
Sinabi kan Presidente kan Estados Unidos na ini ibinalyo hale sa Air Force One sa sarong catering truck tanganing maibitaran na mahiling na nagbabalyo sa ibang eroplano.
Si Trump kaiba sa truck kan nagkapira sa saiyang Aide, kabali an White House Deputy Chief of Staff na si Dan Scavino, an executive assistant na si Natalie Harp asin an direktor kan operasyon kan Oval Office na si Walt Nauta.
An mga opisyales kan gabinete dai kabali sa pagbalyo.
Inako ni Trump na mas halangkaw an peligro na an saiyang eroplano ibalyo nin patago huli pwede ining makakua nin atensyon.
Sinusunod sana kaini an saiyang protocol sa seguridad.
An White House dai tulos ipinahayag sa publiko an pagbabago kan biyahe. Nagdanay ining sekreto sagkod na ibinareta ini kan Washington Post kan Lunes.
Aram na si Trump enot na naglayog sa sarong bagong pighirahay na eroplano na idinonar kan Qatar sa Ankara para sa NATO summit.
Alagad kan maghale ini sa Turkey, bigla kaini na pinili na gamiton an mas lumang Air Force One.
