Pigbatikos ni Senador Erwin Tulfo an paggamit kan magkakaibang grid coordinates kan Department of Public Works and Highways (DPWH) sa mga flood control project asin nangapudan kan sarong pinag-sarong sistema kan pagpaplano asin pagmomonitor tanganing malikayan an kariribungan asin posibleng katiwalian.
Pigmungkahi ini ni Tulfo, makalihis mabuyagyag sa pagdangog na dae tugma an datos gikan sa Multi-Year Programming and Scheduling System (MYPS) asin Project and Contract Management Application (PCMA), na piggamit sa pagtukdo sa mga ghost flood control projects kan mga nakalihis na taon.
Sigun sa senador, an pagkakaigwa nin magkaibang coordinates sa duwang sistema nagigin “grey area” na pupwedeng samantalahon para sa korapsyon. Duon kaini, kun sararo sana an piggagamit na coordinates gikan sa pagpaplano hasta sa aktuwal na pagmomonitor kan proyekto, mas marekas na matutukdo kun may anomalya o mayo.
Pig-uyonan man ni DPWH Undersecretary Ricardo Bernabe III asin pigbisto an pangangaipuhan isagibo an sistema. May pigsasagibo nang mga reporma an ahensya, kaibahan an sarong foreign-assisted project, tanganing pagsararoon an coordinates na piggamit sa mga aplikasyon kan DPWH.
Plano man soboot kan ahensya na maglunsar nin transparency portal asin maggamit nin satellite imaging tanganing mapahusay an pagmomonitor kan mga proyekto asin mabawasan an human intervention.
Sa parehong pagdangog, pig-enkaminar ni Tulfo an DPWH na rekasan an beripikasyon kan listahan kan mga ghost flood control projects sa bilog na nasyon. Sigun sa saiya, an haloy na proseso nagkakawsa nin pagdududa sa publiko asin pupwedeng humantong sa kawalan kan paninimbagan.
Komo tugon, sinaysay ni Bernabe na madali nang matapos an beripikasyon kan 421 na proyektong kaibahan sa listahan kan mga pinaghihinalaang ghost flood control projects.
Mantang pig-uyunan man ni Acting Justice Secretary Fredderick Vida an pangapudan na iluwas na an beripikadong listahan tanganing mapuunan an pagsusunad nin mga kaso kontra sa mga sangkot.
