NAGA CITY – Nagsairarom sa training ngunyan na aldaw, Lunes, Nobyembre 11, 2024 an mga TUPAD benificiaries sa siyudad nin Naga.
Sa nagin paghampang sa mga kagawad kan media ni Nonoy Reforsado, pamayo kan Metro Naga Peso, pigsaysay kaini na an nagin funding kan nasambitan ng program, gikan sa karahaang boot ni Senator Joel Villanueva asin sa paagi man kan pakiulay ni Naga City Mayor Nelson Legacion.
An nasambitan ng orientation requirements soboot kan Department of Labor and Employment, kabali man sa aktibidad na ini an pagpirma kan kontrata kan mga beneficiaries asin an pagtao kan saindang PPEs.
Sigun ki Reforsado na an aldaw na ini considered na komo sarong aldaw sa sampulong aldaw na pagtatrabahuhan kan mga beneficiaries asin man makalihis an training ituturn-over na an mga ini ki former city administrator Elmer Baldemoro huli man ta ini an ma-deploy sa mga tawo.
Dugang pa kan opisyal, na an mga nasambitan ng beneficiaries igwang mga koordinator sa mga kada barangay asin iyo an mga nag-aasikaso tanganing mai-profile an mga benificiaries na pasado sa requirements.
Pigtawan-duon pa man ni Reforsado na mayo soboot sindang kakaputan nin ano man na kwarta, gikan sa DOLE direkta na sa mga benificiaries asin an piggibo sana kan City Government iyo an paghanap kan pondo sa paagi ni Mayor Nelson Legacion.
