NAGA CITY- Stranded pa nanggad hasta ngonyan an nagkakapirang mga turista asin mga kabuhan nin Philippine Coast Guard sa isla kan Calaguas sa probinsya nin Camarines Norte huli sa maraot na kamugtakan kan panahon.
Ini an kinumpirmar ni Chief Petty Officer Raymond San Jose, Deputy Station Commander kan PCG-Camarines Norte sa entrevista kan Bombo Radyo Naga.
Sigon ki San Jose, aldaw nin Sabado kan ikanselar kan saindang hepatura an byahe kan mga lunadang pandagat pasiring asin pahali sa Calaguas Island huli sa makusog na hukol.
Napag-araman na kaiba sa mga stranded an Acting Station Commander kan PCG-Camarines Norte.
Pigsierto man kan opisyal na nasa marhay na kamugtakan an mga turista na stranded ngonyan sa nasambitang isla.
Enot digdi, napag-araman na naglubog an MV Jordan 2 sa barangay Banocboc sa banwaan nin Vinzons makalihis na tamaan nin makusog na hukol mantang pasiring sa isla nin Calaguas.
Naisalbar man kan mga kabuhan kan PCG-Camarines Norte an 19 na mga turista na lunad kan nasambitang baroto.
Mientrastanto, nakabwelta naman sa mainland kan banwaan nin Jose Panganiban an pigkakarkulong labi sa 200 na mga turista na na-stranded man sa Parola Island kan Sabado.
Convoy kan DOJ asin sarong SUV na pigmamaneho nin pulis, nagkarambola sa CamSur; saro nairido
