Pinaiimbestigaran ni Presidente Ferdinand Marcos Jr. an mahewasang wastewater spill kan Universal Robina Corp. (URC) Bais Distillery sa Negros Oriental, na nagkawasa nin fish kill asin danyos sa kabuhayan kan mga parasira.
Sigun ki Palace Press Officer Atty. Claire Castro, pigsugo kan Presidente sa Department of Environment and Natural Resources (DENR) na magsagibo nin tolos na containment operations asin tukduon kun igwang pigbalgar an URC sa irarom kan Republic Act 11038 o Expanded NIPAS Act of 2018, huli sa harani sa Tañon Strait Protected Seascape an pinuonan kan tagas.
Aram na soboot ni Presidente Marcos an insidente asin mahigot na pigsugo an DENR, Philippine Coast Guard (PCG), asin mga local government units na maghiro tolos tanganing pugulan an pagkuriyat kan kontaminasyon.
Dugang pa ni Castro, pinaapod na an DENR an mga opisyal kan URC Bais Distillery asin pigsugo sindang tulos pakarhayon asin linigan an danyos.
Kasabay kaini, pigbawalan kan Bureau of Fisheries and Aquatic Resources (BFAR) an mga residente na magsira o mangolektar nin lamang-dagat sa mga apektadong lugar huli sa peligro sa salud.
Basado sa report, pigkakarkulong 255,000 cubic meters kan wastewater an nagkuriyat sa Bais Bay asin mga pagtaraid na dagat, kawsa kan mahewasang fish kill asin pagdeklarar kan 90-day state of calamity sa banwaan Manjuyod.
