Inaprubahan kan Department of Budget and Management an pag-release kan dugang na P5 bilyon para sa Assistance to Individuals in Crisis Situations program na piglalaoman na makikinabang an mapakol sa 411,188 benepisyaryo ngunyan na Oktubre hasta Disyembre ngunyan na taon.
Sigun ki DBM Secretary Amenah F. Pangandaman, an pondong ini pigtagama tanganing simbagan an kakulangan sa badyet sa irarom kan Protective Services for Individuals and Families in Difficult Circumstances kan Department of Social Welfare and Development.
An pigluwas na allotment asin katampad kaining Notice of Cash Allocation sisingilon sa irarom kan 2025 General Appropriations Act.
Pigtawan-duon kan opisyal na kaipuhan kan gobierno an unprogrammed funds para sa marekas na pagsimbag sa panahon kan sakuna asin kalamidad.
Si Pangandaman an nag-atender sa pagdangog kan Independent Commission for Infrastructure tanganing magtao nin ekspertong paliwanag dapit sa proseso kan National Expenditure Program asin General Appropriations Act.
Inimbitaran ini kan ICI tanganing ipaliwanag kun pano pigluluwas an unprogrammed funds asin linawon an mga kahagadan, prosopwesto, asin dokumentong isinumiter sa DBM kan Department of Public Works and Highways na mawot maibali sa NEP.
Pinaliwanag man kaini na sa mga karaniwang pagkakataon, piggagamit an unprogrammed funds para sa tabang sa mga paraoma kan paroy, mga programang panlipunan siring kan AICS asin Food Stamp Program kan DSWD, subsidiya sa edukasyon, imprastrakturang pangsalud, benepisyo kan mga kawani, renewable energy, asin modernisasyon kan sandatahang lakas.
Pigheras man kan sekretaryo na sa panahon kan pandemya kan COVID-19, marekas na nagamit kan gobierno an unprogrammed funds tanganing pondohan an mga serbisyong pangsalud, proteksiyong panlipunan, asin pagbangon kan ekonomiya, asin kan 2024 ginamit man ini sa mga proyektong pang-agrikultura, edukasyon, salud, asin imprastraktura na nakapalaman sa GAA.
Pigtawan-duon pa ni Pangandaman na sa irarom kan Konstitusyon, nasa Kongreso an inaapod na power of the purse.
