Nahihiling na problema sa pigpaplanong pag-amyenda sa rules of procedure sa impeachment proceedings kan House of Representatives an dae pa nareresolbang enot na impeachment complaint kontra ki Vice President Sara Duterte, sigun sa saro sa nagsirbing House Impeachment Prosecutor.
Sigun ki Bukidnon 2nd District Representative Atty. Jonathan Keith Flores na nakabinbin pa man sa Korte Suprema an saindang motion for reconsideration, na naghahagad tanganing bawion o baliktadon an desisyon kan Korte na nagsabing pagbalgar sa Konstitusyon an impeachment complaint sa Bise Presidente.
Dapat soboot na magluwas na an Korte Suprema nin desisyon sa orog na marekas na panahon tanganing makapagdesisyon an kapulungan kun rerepasuhon o dae an saindang impeachment rules.
Nagtao man nin ideya an lehislador sa mga posibleng rebisyon sa impeachment rules kan Kamara alinsunod sa nagin ruling kan Korte Suprema, kaibahan an pagtatao nin due process sa iniimpeach na opisyal asin pagtatao nin kopya kan articles of impeachment nin igwang supporting evidence para sa gabos kan House members antes ini ma-transmit sa Senado.
Marurumduman, enot nang inihayag ni Tingog Rep. Jude Acidre na nagbabalak an Mababang Kapulungan na magbilog nin bagong impeachment rules na naaayon sa desisyon kan Korte Suprema katakod sa naenot nindang impeachment complaint kontra sa Bise Presidente.
Ini an tanganing masiertong mas makusog na an impeachment complaint enkaso igwang liwat na isunad sa Kamara.
Marurumdumang idineklarar kan Korte Suprema komo “unconstitutional” an impeachment complaint kontra ki VP Sara kan nakalihis na Hulyo 25, 2025 huli sa pagbalgar sa one-year bar rule asin pagtatao nin due process sa Bise Presidente.
Kasunod kan desisyon, nagsunad nin motion for reconsideration an House kan nakalihis na Agosto 4, 2025 na naghahagad sa Korte Suprema tanganing baliktadon an desisyon kaini.
Nagresulta an ruling kan Korte sa pag-untok kan impeachment trial sa Senado asin in-archive an impeachment complaint kontra sa Bise Presidente.
