Nagkasundo an Lebanon asin Syria sa sarong untok-putukan makalihis an duwang aldaw kan madugong sagupaan sa hangganan na ikinagadan kan 10 katao—tulong sundalong Syrian asin pitong Lebanese.
Inanunyar ninda Defense Ministers Michel Menassa kan Lebanon asin man Murhaf Abu Qasra kan Syria an kasunduan, kasabay kan promisa na pagmantinir kan koneksyon kan saindang intelligence units tangani sana malikayan an lumalalang tensyon.
Sumiklab an labanan sa magulong bulubunduking hangganan makalihis mapatalsik an dating Syrian leader na si Bashar al-Assad kan mga Islamistang rebelde.
Nairehistro an 52 lugadan sa Lebanon, mantang inakusaran kan Syria an Hezbollah na naglaog sa saindang teritoryo asin naggadan kan saindang mga suldados—bagay na pinahimutikan kan Hezbollah.
Sigun man sa sarong opisyal kan Lebanon, enot na nag agi sa teritoryo ninda an mga sundalong Syrian antes sinda pig gadan kan armadong mga lokal na pinagtutubudang sinda an inaatake.
Nagbalos man an hukbong Syrian sa paagi kan pambobomba kan nakalihis na banggi, rason man tangani mag ebakwar an mga residente kan Lebanon.
Lunes nin pagkaaga, isinuko kan Lebanese army an mga bangkay kan tulong binawian nin buhay na sundalo sa mga awtoridad kan Syria asin man nagpadara nin dugang pwersa sa hangganan.
Mientrastanto, nagdeploy man nin mga sundalo asin tangke an Syria tangani malikayan an dugang na sagupaan. Sa Brussels, nag meeting sinda Foreign Ministers Youssef Raji kan Lebanon asin Asaad al-Shibani kan Syria tangani sana pag ulayan an nasambitan ng sitwasyon.
