Sarong US-based Filipino doctor na igwang kliyenteng Hollywood stars asin mayayaman na pamilya an napapabaretang posibleng ribayan si Health Secretary Ted Herbosa, sigun sa kolumnista na si Ramon Tulfo.
Sigun ki Tulfo, si Dr. Ronald Rigor, sarong doktor sa Beverly Hills, an igwang plano na gamiton an pondo kan PhilHealth tanganing masakop an bilog na bayad sa ospital para sa mga Pilipino, obheto man soboot kaini na halion an out-of-pocket expenses para sa mga pasyenteng na-admit.
Pigsaysay ni Tulfo na mawot ni Rigor na ibali an nagkapirang private hospitals sa coverage kan zero-balance system kun ini an maitalaga komo health secretary.
Pigsaladawan pa ni Ramon si Rigor komo multimillionaire na igwang bistadong beauty clinic sa Beverly Hills na kliyente an mga Hollywood stars siring ninda Angelina Jolie asin Johnny Depp. Apwera digde, ini man an consultant sa 130 homes for the elderly.
Pigsaysay pa ni Tulfo na preparadong i-renounce ni Rigor an saiyang US citizenship kun itatangro sa saiya an posisyon komo health secretary.
An isyu kan posibleng pagriribay ki Herbosa an nagkusog kasunod kan mga alegasyon nin katiwalian sa Department of Health (DOH).
Sigun sa DOH employees, si Herbosa an soboot igwang conflict of interest huli a pagkaka-fraternize sa health contractor na Zuellig Pharma, kabali na an pag-atender sa company-sponsored trips asin pag-ako kan mga regalo.
Kabali pa sa mga alegasyon an P1.29 billion cash transfer sa UNICEF para sa bakuna asin essential medicines mula Pebrero 2024 hasta Hulyo 30, 2024, na dae pa naliliquidate; Pag-apruba sa dugang na P524.9 million para sa pagbakal nin bakuna gikan sa UNICEF mantang dae pa naliliquidate an naenot na pondo; P98 million na gastuson sa DZMM program na pinamamayuhan soboot ni Herbosa kaibahan si DOH Health Promotion Bureau Director Tina Marasigan asin Assistant Secretary Albert Domingo.
Pigkwestyon man ni Tulfo si Presidente Ferdinand Marcos Jr. huli sa kakulangan nin background check ki Herbosa antes i-appoint.
