Nangenot sa kampanya kontra sa human trafficking an US embassy sa Manila. Puon Marso 24 hasta 28, nag-host an gobyerno kan Estados Unidos sa paagi kan Defense Threat Reduction Agency (DTRA) kan maritime security training tanganing pakusugon an kakayanan kan gobyerno kan Pilipinas na kontrahom an hazardous chemical, biological, radiological and nuclear (CBRN) materials.
Sa Targeting and Risk Management Workshop sa Maynila, sinaysay ninda asin kan facilitators gikan sa Philippine Office for Transportation Security (OTS) an 35 representantes gikan sa manlaen-laen na ahensiya kan gobyerno sa pagbisto asin paghadlang sa iligal na barko asin kargamento.
Kaibahan sa pagsasanay an “train-the-trainer” activities tanganing mamantinir an mga lakdang sa seguridad sa maritime operational asin doctrinal gaps.
An mga partisipantes an gikan sa manlaen-laen na ahensiya siring kan Department of Trade and Industry, Department of Transportation, Bureau of Customs, Philippine Ports Authority, Maritime Industry Authority, Philippine Coast Guard, Philippine Navy, asin Philippine National Police Maritime Group.
Pinasalamatan ni Director Jose S. Embang Jr., an Defense Threat Reduction Agency sa suporta kaini na magtabang sa Pilipinas na patibayon an mga paagi sa pagsimbag sa mga potensiyal sa hazardous materials sa mga pantalan.
Pigtawan-duon kan workshop an pagpapakusog kan US-Philippine cooperaion para sa seguridad asin kauswagan kan rehiyon kan Indo-Pacific.
