Liwat na nagpadara nin mga fighter jet an North American Aerospace Defense Command (NORAD) tangani sabaton an sarong eroplano kan Russia na nanutaran sa Alaskan Air Defense Identification Zone (ADIZ) kan nakalihis na Dominggo (aldaw sa Amerika) na susog sa mga opisyal ikatulong beses kan nangyari sa laog sana kan sarong semana.
Susog sa report, sarong Il-20 na eroplano kan Russia na ginagamit sa surveillance asin man reconnaissance an nahiling sa laog kan ADIZ.
Napagaraman na kan nakalihis na Agosto 20 asin petsa 21 kan taong ini, naenot nang nagpadara nin F-16 jets an U.S. tangani tukuyon an kaparehong modelo kan eroplano kan Russia na naggagala man sa Alaskan ADIZ.
Komo kasimbagan, tulos na ipinadara kan NORAD an sarong E-3 Sentry command and control aircraft, duwang F-16 fighter jets, asin duwang KC-135 Stratotankers tangani sabaton asin man bistuhon an aircraft.
Nilinaw man kan NORAD na nagtinir an eroplano kan Russia sa international airspace asin dae ini naglaog sa airspace kan Estados Unidos asin man Canada.
Ipinaliwanag man kan ahensya na an Air Defense Identification Zone an sarong parte kan international airspace kun saen kinakaipuhan soboot matukoy an gabos nin eroplano para sa national security kaini.
