Ipighayag kan Estados Unidos an planong pagpapautob kan visa bond na pwedeng mag-abot sa $15,000 para sa mga turista asin negosyanteng gikan sa mga nasyong igwang halangkaw na kaso kan visa overstay.
An programa an parte kan 12-bulang pilot project na obhetong porbaran kun epektibo an paggamit kan visa bonds tanganing masierto na mahali sa takdang panahon an mga banyagang nagbibisita sa irarom kan visa na B-1 (business) asin B-2 (tourist).
Enot nang pigbusol an panundon puon sa administrasyong Trump kan nakalihis na 2020 na dae man tulos naisakatupadan.
Huli digde, target ngunyan kan polisiya an mga nasyong igwang labi sa 10% overstay rate na kadalasan an gikan sa Africa asin nagkapirang parte kan Asya.
Sigun sa report, ibebweltada an bond kun maghali nin maray an nagbisita sa nasyon, nagin mamamayan kan US o binawian nin buhay.
An listahan kan mga nasyong sakop kan programa an iluluwas sa travel.state.gove makalihis an 15-aldaw antes ini ipautob.
Mientrastanto, kinondenar kan nagkapirang sektor an polisiya komo parte kan mas mahigot na lakdang sa immigration, mantang nagpatanid an US Travel Association na posibleng orog na magbaba an numero kan mga dayuhang nagbibisita sa Amerika na presenteng nakakaeksperyensiya nin 11.6% na pagbaba sa international tourism.
