Nangapudan si US President Donald Trump sa mga nasyon na miyembro kan International Criminal Court (ICC) na maghali sa nasabing korte.
Ipighayag ini ni Trump sa saiyang talumpati sa ika-81ng United Nations General Assembly sa New York kan Martes, Setyembre 22. Pig-insistir kan presidente kan US na dai tutugutan kan Estados Unidos na imbestigaran o husgaran sa ICC an mga soldadong Amerikano.
Apod man ni Trump sa ICC sarong institusyon na “out of control” asin sarong “evil group of people.”
Naroromdoman na haloy nang kritikal an administrasyon ni Trump sa ICC. Kan Hulyo, nanawagan man si US Secretary of State Marco Rubio sa ibang mga nasyon na maghali sa nasabing tribunal.
Bakong miyembro kan ICC an Estados Unidos asin dai kaini niratipikahan an Rome Statute, an kasunduan na nagsirbing basehan sa pagbilog kan korte.
An ICC, na nakabase sa The Hague, Netherlands, igwa nin mandato na husgaran an mga indibidwal na inaakusaran nin genocide, crimes against humanity, asin war crimes.
