Naglobo pa an kabilogang utang kan gobierno kan Pilipinas sa P16.31 trillion sa pagtatapos kan Enero 2025, base sa datos kan Bureau of Treasury (BTr).
Mas halangkaw ini nin P261.47 billion o 1.63% kumparar kan Disyembre 2024, huli ta mas kadakol nin nautang an gobierno asin naglangkaw an kantidad kan mga utang sa dolyar kan satuyang nasyon kawsa kan pagluya kan kantidad kan piso.
Napansin kan Treasury na an kantidad kan piso an nagluya sa P58.375 sa pagtatapos kan Enero 2025 gikan sa P57.847 sa pagtatapos kan 2024.
Sa kabilogan, nasa 67.9% digdi an gikan sa panlaog na utang mantang an natatadang 32.1% an gikan sa panluwas na utang.
Sa pagtatapos kan Enero, naglangkaw sa P11.08 trilyon an panlaog na utang mantang naglobo man sa P5.23 trilyon an utang sa ibang nasyon.
Sa ibong kaini, sinaysay kan Bureau of Treasury na nagtitinir na manageable an utang kan gobyerno asin naaayon sa target kaini na suportaran an pag-uswag kan ekonomiya mantang pigsisierto an pagmamantinir kan pananalapi.
Sinaysay man kan mga economic managers na mayong dapat ikahadit sa nagdadakulang utang kan nasyon hasta sa padagos an pag-uswag kan ekonomiya.
