Naga City-Pigbareta kan Bureau of the Treasury na nagsakat pa an utang kan Pilipinas sa ₱15.35 Trillion kan Mayo ngunyang taon.
Sigun sa ahensya, an kabilugang utang nagsakat nin ₱330.39 bilyon o katampad nin 2.2% sa katapusan kan Abril 2024.
Ini huli na man sa epekto kan pagbaba kan value kan local currency sa valuation kan foreign-currency denominated debt.
Nakarehistro man an nasyon nin year-on-year na paglangkaw sa utang kaini na maabot sa 8.4%.
Basado sa kabilugang debt stock kan nasyonal na gobyerno, 31.96% an external debt mantang 68.04% an domestic debt.
An domestic debt level sa katapusan kan bulan nin Mayo na ₱10.44 trilyon mas halangkaw nin 1.3% kumparar sa katapusan kan Abril.
Paliwanag kan BTr, an paglangkaw nagresulta gikan sa ₱131.66 bilyon na net issuance kan government securities asin ₱2.68 bilyon na epekto kan peso depreciation sa foreign-currency denominated domestic debt.
