NAGA CITY- Dae nalikayan na kiligon kan nagkapirang mga atleta makalihis mahiling an ginibong pag-propose kan sarong lalaki sa tahaw kan nagpapadagos na Palarong Bicol 2018 kasuudma sa syudad nin Naga.
Sa pakikipag-olay kan Bombo Radyo Naga sa saro sa mga technical team kan football , sinaysay kaini na dae niya napugulan na kiligon kan mahiling an ginibong proposal kan lalaki sa saiyang kailusyon kun saen dae soboot ini nasupog sa kadakol na tawo.
Apwera digdi, hiling -hiling niya soboot an dobleng effort asin pagpadangat kaini sa kailusyon kung kaya kadakol an naogma sainda.
Kun marurumduman, agaw-atensyon an nangyaring marriage proposal kan sarong lalaki sa saiyang nobya sa football field kan Metro Naga Sports Complex sa Barangay Pacol.
Napag-araman na half time break kan kawat na football sa pagultanan kan Naga City delegation asin Sorsogon Province kan biglang magtanog an kantang Perfect ni Ed Sheeran na sinabayan kan pagdulok kan saro sa mga miyembro kan Naga City Rescue team sa saiyang nobya na nagdadalan kan kawat antes nagluhod asin iniluwas an dara-darang singsing.
