Pig-anunsyar kan state media kan Vietnam na hahalion na ninda an padusang kagadanan para sa walong krimen puon Hulyo 1, 2025, kabali an panunuhol, paggibo nin pekeng bulong, asin pagporbar na pabagsakon an gobyerno.
Basado sa report kan Vietnam News Agency, unanimous na pig-aprubaran kan National Assembly an mga amyenda sa Criminal Code kan Miyerkules.
Kabali man sa mga krimeng dae na papatawan nin death penalty an espionage, paminsalang panraraot sa ari-arian kan estado, pagpapabakal nin iligal na droga, asin paghahasik nin digmaan o panganib sa katuninongan.
Sa ibong na lado, pinakahalangkaw na padusa para sa mga nasambitan ng krimen an magiging hambuhay na pagkakulong na sana.
Napag-araman na gabos na nainot nang nasentensyahan nin kagadanan para sa mga nasambitan ng krimen an mailalaag sa habambuhay na pagkakakarsel.
Mientrastanto, sampulong krimen an mapadagos na may padusang kagadanan sa nasyon, kabali an murder, treason, terrorism, asin sexual abuse sa mga aki.
Dae man iniluwas kan gobyerno an opisyal na numero kan nasa death row, nin huli ta pigkokonsiderar ining state secret.
Puon 2011, lethal injection an ginagamit na paagi kan Vietnam sa death penalty imbes na firing squad.
