NAGA CITY- Tulos na nagresponde ang mga otoridad makalihis na makaresibe nin impormasyon katakod kan suboot vintage bomb na nadukayan sa gilid kan Naga River harani sa sarong hotel sa ciudad.
Sa intrevista kan Bombo Radyo Naga ki SPO2 Tobias Bongon, tagapagtaram kan Naga City Police Office (NCPO), sinaysay kaini na nadiskubre an bomba mantang nagkakalot harani sa salog an sarong Melvin Genovis.
Tulos man suboot na naghagad nin tabang sa mga otoridad an nasambitan na indibidwal makalihis na mahiling an vintage bomb.
Sa ngonian, nasa kustodiya na kan mga otoridad an nasambitan na bomba mantang nangapodan man si Bongon sa publiko na maglikay asin tulos na ipaisi sa mga otoridad an mga siring na klase nin insidente tangani na maibitaran an ano man na aksidente.
