NAGA CITY- Padagos na nagdadakol an nagvo-volunteer sa Philippine Red Cross Camarines Sur.
Sa entrevista kan Bombo Radyo Naga ki Maria Felisa Badiola, Chapter Administrator kan Philippine Red Cross Camarines Sur, sinaysay kaini na uru-aldaw igwang malalaoman na volunteers gikan sa saindang organisasyon orog na ta nagpapadagos man an recruitment o pag-enkaminar kan saindang lado sa publiko na magin parte kan pagtatao nin serbisyo sa publiko.
Sigun ki Badiola, sarong patotoo digde an kasuarin sanang mga aktibidad sa bilog na probinsiya asin siyudad nin Naga kun saen nakapag mobilize sinda nin nasa 1700 na volunteers.
Dugang pa kan opisyal, target kan saindang organisasyon na gabos na Barangay sa Camarines Sur magkaigwa nin volunteer komo pagpapautob kan RC143 o 1 community with 44 volunteers.
An mga volunteer an pwedeng magpili kan serbisyo na saindang lalaugan kun kaya magin an mga medical personnel pig-eenkaminar na magbali digde. Katakod kaini, nagsasagibo nin trainings asin orientation an Philippine Red Cross Camarines Sur sa mga mawot na magin parte kan saindang organisasyon.
Mientrastanto, para man sa mga kinakaipuhan na requirements, an sarong indibidwal na mawot magin volunteer an dapat physically fit, adbentahe an nakapag-training na nin First aid, nakapagdonar nin dugo asin an pinakaimportante an udok sa boot na pagserbisyo sa komunidad.
Sa ngunyan, dagos-dagos an mga programa na pig-iimplementar kan Philippine Red Cross Camarines Sur sa bilog na probinsiya kan Camarines Sur.
