Ipinapauktaba kan Commission on Elections (Comelec) an voter registration para sa barangay asin Sangguniang Kabataan elections (BSKE) na nakatalaan sa Hulyo sa tahaw kan propwestong term extension kan mga opisyal.
Ginibo ni Comelec Chairman George Garcia an pahayag kan Huwebes makalihis ratipikahan kan Senado kan Miyerkules nin pagkabanggin sa bicameral conference committee report na obhetong pahewason an termino kan panunungkulan kan barangay asin SK officials puon tolo hasta apat na taon asin ipagpauktaba an eleksyon sa enot na Lunes kan Nobyembre 2026.
Sigun ki Garcia, pigrerespeto kan Comelec an mapapagkasunduan asin masunod sana sinda.
Sigun pa ki Garcia, pig-enkaminar ninda an desisyon ni Presidente Ferdinand Marcos Jr. kun aaprubaran o ibe-veto an propwestong ley.
Sinaysay man kan poll chief na an poll body an nakatalaang magsagibo nin emergency meeting sa masunod na semana tanganing pag-ulayan an pagpepreparar sa BSKE, kabali na an procurement kan requirements asin an posibleng suspensyon kan voter registration. Piglalaoman man ni Garcia na mapakol sa 70 milyong Pilipino an magrerehistro para makaboto para sa BSKE.
Pighihiling man kan Comelec na maghurot nin mas halangkaw na pondo para sa 2026. Katakod, mayo pang desisyon si Presidente Ferdinand Marcos Jr., kun posibleng pirmahan kaini an propwestong ley na magpapalawig sa termino kan Barangay asin Sangguniang Kabataan o SK officials gikan sa tolong taon pasiring sa anom na taon.
Pahayag ini kan Palasyo makalihis ipasar kan Kamara an propwesatong term extension asin an pag-aprubar kan Senado sa pagpapauktaba kan Barangay asin SK elections.
Sigun ki Palace Press Officer Claire Castro, pigrerespeto ni Presidente Marcos Jr., an proseso kan lehislatura sa pagpasar kan propwestong ley.
Alagad sa ibong kaini, mawot soboot kan presidente na dapat naaayon sa adhikain kan tamang pamamayo asin pag-uswag kan komunidad an obheto kan anumang pagbabago sa sistema kan pamamayo kan mga opisyal kan barangay asin SK.
Nagtutubod man an Palasyo na dapat madagos an naka-schedule na barangay asin SK elections ngunyan na taon hasta mayong pigpipiirmahan na ley an presidente na makanselar o mapauktaba sa eleksyon.
