Piggirumdom ni Vice President Sara Duterte an buhay asin diwa kan Pambansang Bayani na si Dr. Jose Rizal sa saiyang pahayag ngunyan na aldaw kan pagkomemorar sa kabayanihan kan makata asin parasurat
Sigun ki Duterte, sa paagi kan mga akda ni Rizal naipamana sa sambayanang Pilipino an mayong-takot na pagpapadangat sa nasyon asin an pangaturugan sa totoong katalingkasan na nakabase sa liwanag kan kaaraman.
Pigtawan-duon kan Panduwang Presidente na an adal ni Rizal malinaw: an katalingkasan bako sana sa pagpalibre gikan sa puwersang dayuhan, kundi pati na man an pagpalibre kan isip asin boot gikan sa pang-aabuso, pagkawatak-watak, asin karautan.
Sa saiyang mensahe, pig-enkaminar ni Duterte an mga Pilipino na liwat manumbalik an pusog asin isog tanganing manindugan para sa katotoohan asin katarungan. Dugang pa kaini, dae dapat pabayaan magadan an diwa kan karunungan asin pagkakasararo na pinaglaban kan heroe.
Pigbanggit man kan Panduwang Presidente na an totoo asin panhaluyang pagbabago nagpupuon sa hararom na pag-aadal, moral na integridad, asin nagkasararong paghiro sa komunidad asin mga institusyon.
Sa pagtatapos kan saiyang pahayag, pigpagirumdom ni Duterte an importansiya kan pagpadaba sa Pilipinas, para sa Diyos, sa Bayan, asin kada Pamilyang Pilipino, komo pagpupugay sa diwa ni Dr. Jose Rizal.
