NAGA CITY- Dae nagpapaapektar si Vice President Leni Robredo sa iprinisentar ni Atty. Bruce Rivera na kopya kan impeachment complaint kontra saiya kasuudma.
Ini an sinaysay ni Georgina Hernandez, tagapagtaram kan bise presidente sa ekslusibong intrevista kan Bombo Radyo Naga.
Segun ki Hernandez, dae nakaapektar ki Vice President Robredo asin sa saiyang trabaho an nasambitan na impeachment complaint.
Preparado man suboot an saindang kampo na kahampangon an nasambitan na reklamo kontra sa bise presidente.
Nagsayuma man na magtao pa nin komentaryo si Hernandez sa posibleng posisyon kan mga kongresista sa impeachment complaint kontra ki Robredo asin sinabi na dae na muna ninda papangenotan an ano man na desisyon kan mga lehislador.
Segun pa ki Hernandez, haloy na nindang pinaglalaoman an nasambitan na reklamo makalihis na enot na magluwas an bareta na masangat nin impeachment complaint si House Speaker Pantaleon Alvarez kontra ki Robredo.
Mientrastanto, pighahalat ngunyan kan kampo ni Vice President Robredo an kopya kan impeachment complaint.
Klinaro man ni Hernandez na bako pa pormal na naisangat an reklamo huli ta mayo pang kongresista na nag-eedorso digdi.
Nag-ugat suboot an nasambitan na impeachment complaint huli sa video message kan Bicolanang bise presidente sa Unites Nations Commission on Narcotic Drugs dapit sa kampanya kontra droga kan administrasyong Duterte.
