Personal na nag-atender ngunyan na aldaw si Vice President Sara Duterte sa pagdangog kan House Committee on Appropriations katakod kan prosopwestong P902.8 milyong budget kan saiyang opisina para sa taong 2026.
Pigkundusir an deliberasyon sa lower House, kun saen pinag-urulayan an alokasyon kan pondo para sa Office of the Vice President (OVP).
Marurumduman, na-reschedule an pagdangog makalihis na dae mag-atender si VP Duterte kan nakalihis na semana na rason tanganing ipauktaba kan komite an orihinal na schedule.
Kan Setyembre 12, dae nag-atender si VP Duterte o maski sarong undersecretary sa enot na nakatalaan na pagdangog.
Imbes, assistant secretary an ipinadara kan OVP, alagad dae inako kan komite komo bastanteng representate.
Sigun sa mga lehislador, tradisyon sa Kamara na an pamayo kan ahensya o sarong undersecretary an dapat maghampang sa budget hearing.
Katakod digde, nagluwas nin pahayag an OVP na nagsasabing preparado sindang mag-atender si VP Duterte kan Setyembre 12, alagad pig-abisuhan soboot sinda kan sponsor kan budget na dae na magdagos makalihis na maaraman na mayong undersecretary na makaka-atender.
An OVP an naghuhurot nin P902.8 milyon para sa 2026, mas halangkaw kumparar sa P744 milyon na alokasyon ngunyan na taon.
Sigun sa ahensiya an dugang na pondo an gagamiton para sa pagpapahewas kan mga programa asin serbisyo kan OVP.
