Nagsunad na man nin suway na Petition for Certiorari and Prohibition sa Supreme Court si VP Sara Duterte katakod kan impeachment case na pigsunad sa saiyang kan Kamara.
Pigsumiter ini kan kampo kan bise presidente sa paagi kan Fortun Narvasa and Salazar law offices.
Napag-araman na naresiber na ini kan korte alagad dae na naihabol sa saindang en banc session kasuudma.
Apwera kaya ini sa petisyon kan apat na Mindanawon lawyers tanganing tapaan an impeachment proceedings kontra sa bise presidente.
Pighagad man kaya kan mga abogado na sinda Atty. Israelito Torreon, Atty. Martin Delgra, Atty. James Reserva, Atty. Hillary Olga Reserva, asin Atty. Luna Acosta—na magpaluwas an Korte Suprema nin Temporary Restraining Order (TRO) asin Injunction tanganing ipawarang-bisa an impeachment complaint.
Kaiba man sa mga nagpetisyon an Bise Alkalde kan Davao City, pirang miyembro kan konseho kan siyudad, asin mga bistadong political vloggers na sinda Darwin Salcedo, Lord Byron Cristobal, asin Lord Oliver Raymund Cristobal.
Sigun sa sainda, depektibo asin dae dapat dangugon kan Senado an impeachment complaint na pigsunad kan Kamara. Kwestiyonable soboot an verification process kan impeachment complaint.
Duon kan mga petitioner, dae pinag-adalang nin marhay kan mga nagpirma sa reklamo an nakapalaog digdi asin biglaan sanang pigbali sa usapin kan impeachment.
Alagad depensa kan Kamara, moot and academic na ini huli ta nasa Senado na an reklamo asin bako na an korte an may hurisdiksyon digdi.
