Epektibo sa maabot na Abril 8 an wage increase sa Bicol Region makalihis an mga deliberasyon kan Marso 3.
Sa entrevista kan Bombo Radyo Naga ki Imelda Gatinao, Regional Director kan DOLE Bicol, nagpaabot nin dakulang pasasalamat sa saiyang mga pag-iriba sa Regional Tripartite Wages and Productivity Board (RTWPB) makalihis an mga deliberasyon kan Marso 3. Kabali sa hunta an mga representante hale sa Department of Trade and Industry (DD), duwa, Department of Development asin labor mga representante gikan sa sektor sa pamamahala. An desisyon resulta kan mahiwas na konsultasyon sa anom na probinsya asin duwang public hearing na nagpoon kan Enero 13.
Pig-eksplikar kaini na base sa datus hale sa Philippine Statistics Authority (PSA), 92.6% kan mga negosyo sa Bikol an mga micro-establishments, kun saen 84.4% an yaon sa service sector arog kan transportasyon, turismo, hotels, asin retail. Sa presente, an minimum na sueldo na ₱435 mas hababa sa poverty threshold na ₱460, asin an tunay na halaga kan sueldo ₱320 sana huli sa inflation. Huli kaini, uminoyon an hunta sa ₱45 na pag-oswag na ipapaotob sa duwang kabtang: ₱20 sa Abril 8 asin ₱25 sa Disyembre. Sa kabilogan, an minimum na sueldo madudugangan sa ₱480.
Segun ki Gatinao, obheto kan wage hike na parsial na mapano an gap sa poverty threshold mientras na pigkokonsiderar an kakayahan kan mga micro asin small businesses na magbayad. Kasabay kaini, pigsierto kan DOLE asin mga ahensya arog kan DTI asin DepDev na matao sinda nin technical assistance visits, training services, asin suportang programa para sa mga saradit na negosyo tanganing mapakusog an voluntary compliance asin produktibo.
Segun pa ki Gatinao na an wage increase bako sanang wage increase kundi oportunidad para sa mas hararom na diyalogo sa pag-ultanan kan mga employer asin trabahador. Sinabi kaini na kun namamatian kan mga trabahador na pinapahalagahan sinda, mas magiging responsable asin matao nin marhay na serbisyo, na maresulta sa pagtalubo kan mga negosyo asin kan rehiyon.
Tinawang-duon kaini na an wage order kan Marso 23 an magiging epektibo sa Abril 8. Sa ibong kan angat para sa mga negosyo, naglalaom an RTWPB na an ₱45 na pagtaas matao nin economic relief asin social protection sa mga minimum wage earners sa Bicol Region.
