NAGA CITY – Pigkondusir ngunyan na aldaw an Walang Gutom Information Caravan sa Pili, Camarines Sur.
Marurumduman, nakabali an banwaan kan Garchitorena sa mga lugar kun sain pigkondusir an pilot implementation kan nasambitan ng programa. Sa nagin patara-tara ni Secretary Rex Gatchalian kan DSWD, sinaysay kaini na an mga magigin benipisyaryo kaini an mga pamilya na dae nagkikila nin labi P9-K kada bulan.
An mga ini man an tatawan nin sarong ATM card na igwa nin P3-K na food credits tanganing malikayan na magastos ini sa ibang bagay. Kaipuhan sana nindang magpasiring sa tindahan na nakipagpartner sa ahensya tanganing ma credit an saindang food vouchers.
Igwa man soboot nin mga itataong smart phones sa mga ini kun sain duman bibilangon an food credit kan mga benipisyaryo. Kaipuhan sana na i-scan an QR code asin duman maluwas an lalawgon kan kagsadiri kaini tanganing masierto na talagang an may sadiri sana an makakagamit kan nasambitan ng ATM card.
An obheto man soboot kan nasambitan ng programa an mabago an eating habit kan lambang pamilya tanganing malikayan an pagkakaigwa nin malalalang helang pag-abot na naggugurang na an sarong tawo. Katakod kaini, nagpaabot man nin pasasalaman si Camarines Sur Governor Luigi Villafuerte sa sekretaryo huli sa padagos kaining pagheheras nin tabang sa probinsya orog na sa panahon kan kalamidad asin pangangaipuhan.
Mientrastanto, tinawan importansya man ni Mayor Rex Oliva kan Iriga City an pagpapautob kan nasambitan ng programa. Ini orog na ta an obheto kaini an mabawasan an naaeksperyensyahang pagkagutom kan mga residentes; maresolbaran an malnutrisyon; food security asin agricultural sustainability.
Magigin dakulang tabang man ini sa mga residentes orog na ta sa saindang syudad pa sana igwa na sinda nin nasa 696 na benipisyaryo kan programa. Tinawan duon man kan alkalde na an DSWD mismo an nagpili kun sisay an mga magigin benipisyaryo kan programa.
