NAGA CITY- Arestado an walong indibidwal makalihis na madakop na nagsasagibo nin iligal na pagsisira sa coastal waters kan Presentacion sa banwaan nin Lagonoy, Camarines Sur.
Sa entrevista kan Bombo Radyo Naga ki PCPT Mark Spaña, Chief of Police kan Presentacion MPS, sinaysay kaini na mantang nagkukundusir nin seaborne patrol operation an saindang mga personahe sa kadagatan na sakop kan Presentacion kan masaktuhan kan mga ini an sarong bangka na kulay green lunad an mga nasambitan ng mga indibwal.
Sigun sa opisyal an mga ini an naglalatag nin net tanganing magsira kun kaya pigranihan kan mga otoridad.An mga violators an mayong naipresentar na dokumentos o permit na nagtutugot sa sinda an magsira sa lugar.
Siringman an Kapitan kan nasambitan ng bangka an mayong naipahiling na lisensiya na malinaw na sarong pagbalgar sa Presentacion Municipal Ordinance no. 6 series of 2012.
Dugang pa kan opisyal, an lugar na pigsiraan kan mga nadakop an laog sa 15 kilometers na ipinagbabawal an pagdadakop nin sira.
Katakod digde, nakumpiskar sa mga nasambitan ng mga indibidwal an Motorize banca na nagkakantedad nin nasa 95-K, Fishing net na nagkakantedad nin nasa 78-k asin manlaen-laen na klase kan sira na nagkakantedad nin nasa 9,500.
Sa ngunyan, nasa kostodiya na kan Presentacion MPS an nasambitan ng mga indibidwal siringman an nakumpiskar na mga kagamitan.
