Naga City-Nagheras nin pagkondenar an mga war veterans kan nasyon laban sa barbaric, mapang-alipusta asin provocative na aksyon kan China sa komprontasyon sa pag-ultanan kan mga personahes kan China Coast Guard asin tropa kan Pilipinas sa kasagsagan kan resupply mission sa outpost kan BRP Sierra Madre sa Ayungin Shoal sa West Philippine Sea kan Hunyo 17 na nagin rason kan pagigin irido kan pirang mga personahes kan Philippine Navy kun saen saro sainda an naputulan pa nin muro.
Nagheras man nin suporta an Veterans’ Federation of the Philippines ki Presidente Ferdinand Marcos Jr. sa pagduon kan mga karapatan kan Pilipinas sa West Philippine Sea na parte kan 370 km exclusive economic zone kan satuyang nasyon.
Nag-apelar man an mga beterano sa international community na kondenaron an mga agresibong aksyon kan China sa ngaran kan sangkatauhan, pagrespeto sa international law, asin rules-based international order.
Nagheras man sinda nin suporta para sa Department of National Defense asin sa strategic transformation agenda kan militar tangani na magbilog nin magabat na deterrent posture sa paagi kan Comprehensive Archipelagic Defense Concept.
Pig-omaw man kan mga beterano an mga defender kan West Philippine Sea na pig-apod nindang mga modernong herowe.
Pig-enkaminar man kan mga beterano an gabos na Pilipino na magkasararo sa pagtaong suporta sa mga nagkakaag sa saindang buhay sa peligro tangani na depensaran an satuyang mga karapatan, depensaran kun ano man an satuya, asin protehiran an satuyang futuro.
