Makalihis an apat na taong pagtatago, naglantad na si Julie “Totoy/Dondon” Patidongan, an whistleblower sa kaso kan nawawarang sabungero tanganing magsunad nin reklamo kontra sa 12 pulis na soboot imbwelto sa pagdukot asin paggadan sa mga biktima.
Sa pigsunad na affidavit complaint sa Napolcom, kasuodma, Hulyo 14, sinaysay ni Patidongan na pwedeng mag-abot sa labi 100 an totoong numero kan mga nawawara.
Sa sarong press conference, pigbuyagyag kaining dinara soboot an mga sabungero sa sarong farm harani sa taal lake na inupahan kan saro sa mga pulis antes gadanon asin iapon an mga lawas sa lawa puon 2021 hasta 2022.
Dae napugolan ni Patidongan na magin emosyonal kan haputon kun tano ngunyan sana ini naglantad. Alagad maski dae tinukoy kun sisay an nagbanta sa saiyang pamilya, direkta kaining idinawit an negosyanteng si Charlie “Atong” na utak soboot sa krimen, asin sinasaysay na sinugo kaini an paggadan sa mga sabungerong pighihinalaang nagdaya o nag-match fixing.
Maduon man na pinahimutikan ni Ang an mga paratang asin nagsunad na man nin kaso kontra ki Patidongan, kaibahan an robbery, grave threat, asin paninirang-puri.
Padagos man na nagsasagibo nin search operations an Philippine Coast Guard sa Taal Lake, kun saen limang sako kan mga sulong buto kan tawo asin hayop an narekober na sa irarom kan dagat.
Sigun sa Napolcom, piglalaomang maluwas sinda nin resolusyon sa laog nin 60-aldaw katakod kan mga reklamong pigsunad ni Patidongan.
