Nakapagrehistro an World Health Organization (WHO) nin nagpapakol na sa 565,404 kaso kan cholera asin 7,074 pagkagadan hasta Oktubre 26, 2025 sa 32 nasyon sa limang rehiyon kan WHO.
Pinakahalangkaw an numero sa Eastern Mediterranean Region, na sinundan kan African Region, South-East Asia Region, Region of the Americas, asin Western Pacific Region.
Mayo man nairehistro na kaso gikan sa European Region sa parehong panahon.
Sa bulan kan Oktubre 2025, nakapagrehistro nin 35,026 bagong kaso kan cholera asin acute watery diarrhoea (AWD) gikan sa 20 nasyon sa apat na rehiyon kan WHO.
Ini an 34% na mas hababa kumparar kan nakalihis na bulan nin Setyembre. Sa parehong bulan, naikurit an 335 pagkagadan na may koneksyon sa cholera sa bilog na kinaban, na bumaba nin 55% gikan sa nakalihis na bulan.
Mientrastanto, pigsierto kan WHO na nagtitinir na bastante an suplay kan Oral Cholera Vaccine (OCV).
Kan Oktubre, nasa 7.9 milyong doses an average stockpile, mas halangkaw sa pigtalaang emergency threshold na 5 milyong doses.
