Pigrekomendar kan World Health Organization (WHO) kan Lunes (local time) an paggamit kan lenacapavir, sarong injectable drug na pigtutudok duwang beses sa sarong taon, komo mabisang panlaban soboot sa HIV infection.
Piggibo an anunsyar sa International AIDS Conference sa Kigali, Rwanda, haros sarong bulan makalihis aprubaran kan US FDA an bulong na gibo kan Gilead Sciences.
Sigun ki WHO Director-General Tedros Adhanom Ghebreyesus, mantang nagtitinir na elusive an HIV vaccine, mas marhay soboot na lenacapavir. Piglalaoman na dakulang tabang ini sa mga dae makasunod sa urualdaw na pag-inom nin bulong, o nadidipisilan huli sa stigma asin kakulangan sa access sa bulong.
Sa tahaw kan paghaloy kan global HIV prevention efforts—na may naitagamang 1.3 milyong bagong kaso kan 2024, maikokonsiderar an lenacapavir komo makabagong alternatibo, orog na para sa mga high-risk groups siring kan: sex workers, kalalakihang nakikipagtalik sa kapwa lalaki, transgender, tawong naggagamit nin injectable drugs, mga nakakulong, mga aki asin jovenes na na mana an helang.
Pigrekomendar man kan WHO an paggamit kan mas accessible na HIV rapid tests tanganing maparekas an diagnosis asin mahali an sagabal na kawsa kan magastos asin komplikadong proseso.
Napag-araman na an lenacapavir an kabali sa klase kan bulong na pig-aapod na capsid inhibitors, asin napatunayang haros 100% epektibo sa pagpugol sa HIV base sa mahewasang clinical trials kan nakalihis na taon.
