Liwat na susunudon kan Office of the Civil Defense (OCD) an konsepto kan ‘whole-of-government approach’ tanganing tabangan an mga pamilyang naapektaran sa mga serye kan pagsabog kan bulkang Bulusan.
Sigun ki OCD Undersecretary Ariel Nepomuceno, labi ining makikipag-koordinar sa iba pang ahensiya kan gobyerno tanganing magkaigwa ni ‘unified’ asin epektibong response.
Kaibahan digde an relief operations sa pangengenot kan Department of Social Welfare and Development (DSWD), Health monitoring asin distribusyon kan mga medical supply sa paagi kan Department of Health (DOH), asin iba pang operasyon sa tabang kan manlaen-laen na ahensiya.
Kaipuhan man soboot magin sararoan sana an pag-ebakwar sa mga biktima, tanganing mamantinir an marhay asin epektibong evacuation process.
Kasunod kaini, pigsugo ni Nepumuceno an regional office kaini sa Bicol Region na magtao nin daily situation report mapadapit sa aktibidad kan bulkan asin sitwasyon kan mga evacuees.
An ‘whole-of-government approach’ an komo kasimbagan sa naenot nang kasugoan ni Presidente Ferdinand Marcos Jr. na pagsasagibo kan coordinated disaster management strategy sa panahon kan kalamidad.
Kaipuhan man soboot nin marhay na koordinasyon asin suporta kan mga lokal na gobyerno tanganing magin epektibo an nasambitan ng sistema.
