Nakaekspereyensiya nin 1-point loss an Minessota Timberwolves sa kamot kan kulelat na Utah Jazz, sa skor na 117 – 116.
Dae napugolan kan Wolves an comeback kan Jazz sa 2nd half kan kawat asin sa pangengenot ni Utah forward John Collins na nagkamada nin 29 points asin 12 rebounds sa kabiglogan.
Kapot kaya kan Wolves an 11-point lead sa pagtatapos kan 1st half, 67 – 56, alagad pighapag ini kan Jazz sa paglaog kan 3rd quarter.
Nagbulos an Jazz nin 38 points sa ikatolong quarter asin sulamenteng 26 an nagin balos kan Wolves, dalan tanganing dagusang mapura an 11-point deficit asin ibulsa kan kulelat na team an 2 puntos na lead.
Sampulong segundo antes matapos an laban sa 4th quarter, kapot pa kan Wolves an 1-pt lead, 116 – 115.
Siringman, dae kaini napugolan an cutting dunk shot ni Utah Center Walker Kessler na naghatod sa score na 117 – 116 na kapangganahan.
Dae na nakabawi pa an Wolves asin naeksperyensiyahan an ika-29 na pagkadaog ngunyan na season.
Dae nakapagkawar an nagsisirbing star player kan Wolves asin nangenot sa koponan an sentrong si Naz Reid na nagkamada nin 27 points, 11 rebounds double-double.
An kapangganahan kan Jazz an ika-15 kapangganahan pa sana kaini ngunyan na season mantang naglobo na sa 44 an kapot na pagkadaog.
