Pigtawan-linaw kan Department of Justice na nasa ‘provisional acceptance’ pa sana an status kan dating opisyal kan Department of Public Works and Highways asin mag-agom na Discaya sa saindang Witness Protection Program.
Basado sa opisyal na pahayag kan ahensiya na ipinadara ni Justice Assistant Sec. Mico Clavano, nilinaw digde na sulamenteng proteksiyon pa sana an sakop sa siring na klase kan probisyon.
Boot sabihon, obheto sa programa na masierto an kasalbaduhan kan mga matindog na testigo o mga indibidwal na imbwelto sa maanomalyang flood control projects.
Kun kaya pigkokonsiderar komo ‘protected witness’ an mga naibali sa nasambitan ng ‘Witness Protection Program’.
Partikularmente, kaibahan na digde sinda former DPWH Officials Brice Ericson Hernandez, Jaypee Mendoza, Henry Alcantara, Roberto Bernardo, pati an mag-agom na Pacifico asin Sarah Discaya.
Mantang pigheras man kan presenteng sekretaryo kan ahensiya na si Secretary Jesus Crispin Remulla an pinagkaiba kaini sa pagigin state witness.
Saiyang pigtawan-duon na an pagigin sarong probisyonal an bakong boot sabihon awtomatikong testigo kan testigo.
Boot sabihon asin obheto sana soboot kaini an kahagadang maprotehiran asin masierto an kasalbaduhan kan mga testigong imbwelto sa kontrobersiya.
Sa kabilogan, nasa anom na katawo na an mga nagpahayag kan saindang kamawotang mapasairarom sa Witness Protection Program.
Alagad maski garo nagdadakol o nadudugangan pa kumparar kaining mga nakalihis, dae man ini ikinakilhag pa ni Justice Secretary Remulla.
Natural na sana soboot na magdakol an mga mawot mapabilang sa nasambitan ng programa huli sa mga posibleng maitabang kaini sa saindang kaso.
Malamang soboot inudyukan o inabisuhan ini kan saindang mga abogado huli man ta kalakip kaini asin maikokonsiderar komo sarong state witness iyo an pag-abswelto o pagigin libre gikan sa paninimbagan.
Kun kaya sigun pa ki Justice Secretary Jesus Crispin Remulla, maingat an ahensiya sa pigsasagibong ebalwasyon tanganing maaraman an kun sisay an makakatabang sa case-buildup dapit sa maanomalyang control projects.
Sa presente, sulamenteng mga protected witnesses pa sana an pigluluwas kan ahensiya katakod sa mga testigo o imbwelto sa isyu kan flood control projects.
Pigtawan-duon lan sekretaryo na mayo pang pigkokonsiderar na state witness an Department of Justice huli man ta maagi pa ini sa masusing proseso kan ebalwasyon.
