Nag-apelar si Parañaque 2nd District Representative Brian Raymund Yamsuan na ipagbawal an operasyon kan drones asin iba pang unmanned aerial vehicles (UAVs) sa laog asin palibot kan mga kulungan tanganing maibitaran an pagpuslit kan kontrabando asin iba pang banta sa seguridad kan mga piitan.
Sa irarom kan saiyang pigsunad na House Bill 4797 o an “Drone-Free Jails Act,” ipagbabawal an paggamit kan UAVs sa laog kan 100 metrong radius gikan sa mga kulungan.
Pigtutugutan sana an paggamit kan drones para sa custodial security purposes o sa mga emergency cases na may pagtugot kan jail officials asin permit gikan sa Civil Aviation Authority of the Philippines (CAAP).
Segun ki Yamsuan, dating Assistant Secretary kan DILG, dawa na kapaki-pakinabang an drones sa negosyo asin gobyerno, pwedeng abusuhon ini sa ilegal na paagi, siring kan pagdara kan droga, cellphone, o armas sa laog kan mga kulungan.
Binanggit kan kongresista an insidente sa Batangas kun sain natunton asin nadakoo tulos an mga nagtakas na bilanggo gamit an drones na igwa nin thermal imaging asin night vision.
Alagad, igwa nin mga report man an Bureau of Jail Management and Penology (BJMP) na igwa nin mga drones na naglulupad pasiring sa mga kulungan, na posibleng ginagamit para sa kontrabando o paniniktik.
Nagkapira sa mga syudad siring kan Batangas, San Juan, Baguio, Valenzuela, asin Mandaluyong igwa nin ordinansa na nagbabawal kan paggamit kan drones harani sa mga kulungan.
Oras na magin ganap na ley an nasambitan ng propwesto, an mga mabalgar pwedeng pagmultahon nin ₱50,000 hasta sa ₱200,000 o makulong nin hasta sa sarong taon, o pareho.
An mga makukumpiskar na drones isusuko sa CAAP para sa tamang disposisyon sa laog kan 15 aldaw makalihis an kaso.
