Pig-anunsyar ni Japanese football star Yuki Nagasato an saiyang pagreretiro sa pagkakawat.
An 37-anyos na dating Chelsea striker an nagkawat nin nasa 132 beses para sa Japan sa laog kan 24-taon na professional career.Dinara kaini sa World Cup an Japan kan 2011 kun saen maski babae ini, naggibo pa man giraray nin historya sa pagkawat sa senior men’s team kan 2020.
Kan taong 2020, ini an nagkawat sa second-tier side na Hayabusa Eleven na nagin enot na man babae na nagkawat para sa men’s side sa saiyang nasyon.
An naging desisyon kaini na pagbali sa kawat kan mga lalaki an huli sa inspirasyon gikan ki Megan Rapinoe na dapat magkaigwa nin pantay-pantay na pagtrato.
Nanggana man si Nagasato nin Olympic silver medal kan 2012 London Games kun saen nakapagrehistro ini nin 58 goals para sa Japan.
Magreretiro ini na nasa panduwang puwesto na igwang pinakadakol na goals kasunod ni Homare Sawa na igwang 83 goals.
Sa social media account kan football star, saiyang pig-ako na dipisil an nagin desisyon kaini na magretiro.
