Pigkumpirmar kan Office of the Civil Defense (OCD) na igwang sarong indibidwal na binawian nin buhay mantang pito an naireport na lugadan huli sa epekto kan Super Typhoon Nando asin makusog na habagat sa nasyon.
Sigun ki OCD spokesperson Diego Mariano na binawian nin buhay an sarong indibidwal huli sa landslide na nangyari sa parteng Benguet.
Pigsaysay kan OCD official, igwang naka-standby na rescuers para sa posibleng search and rescue operations sa isolated areas.
Sa presente, apektado an lampas 159,000 indibidwal o katampad kan 43,500 na pamilya huli sa epekto kan bagyo.
Sa nasambitan ng numero mapakol sa hasta 5,000 pamilya an pig-ibakwar pasiring sa mga evacuation centers.
Sigun pa sa assessment kan ahensiya, may 38 lugar sa nasyon an nawaraan nin suplay kan kuryente.
Pag-abot man sa mga linya kan komunikasyon, mayo pang narereseber an ahensiya nin anuman na aberya alagad padagos an saindang pigsasagibong pagsusuri.
Mientrastanto, dagos-dagos man an pagtabang kan ahensiya sa Department of Social Welfare and Development (DSWD) para sa pagtao kan relief aid sa mga piglamasa kan bagyo.
Pigsaysay man ni OCD spokesperson Mariano na igwa nang naka-preposition na food packs para sa mga pamilya pirang aldaw antes pa man magtama an bagyo sa nasyon asin pigsierto na mayong kakapusan sa suplay kan mga pigtataong relief aid.
