Nagpatanid an Presidential Communications Office (PCO) kontra sa pagpalakop nin mga salang impormasyon na nag-aaprobetsar sa presenteng kamugtakan kan enerhiya sa nasyon.
Sa pahayag ni PCO Secretary Dave Gomez, sinaysay kaini na an sisay man na tuyong magmukna asin magpalakop nin fake news online papanimbagon sa irarom kan ley.
Pigpagirumdom ni Secretary Gomez na an pagpalakop nin “fake news” may penalidad na maabot sa anom na bulan na pagkapreso sa irarom kan Revised Penal Code.
Kun ini gigibohon online, doble an penalidad sa irarom kan Cybercrime Prevention Act.
Sigon ki Gomez, an disinformation nakakaraot kan tiwala kan publiko, nakakapaluya sa ekonomiya, asin nakakapeligro sa karahayan kan mga namamanwaan urog na sa tahaw kan energy challenge.
Tinawang-duon kaini na dai mag-aalangan an gobyerno kontra sa mga tuyong nagpapalakop nin salang impormasyon para sa personal o political na ganansya.
Ikokonsiderar suboot na seryosong pagbalga an anuman na pagprobar na patalawon an publiko dapit sa seguridad, supply, asin presyo kan enerhiya.
Sinabi pa kan Secretary na makikoordinar an PCO sa Department of Justice (DOJ) ngani na magsangat nin kaso kontra sa mga napatunayan na nagpapalakop nin nakakaraot na impormasyon asin nagmaniobra sa merkado.
Pinakusog man kan ahensya an pagbantay sa social media asin iba pang mga agihan nin impormasyon tanganing mamidbid asin maibitaran an mga organisadong kampanya nin disinformation, sa pakikipagtabangan sa Oplan Kontra Fake News.
Inasegurar kan gobyerno an padagos na pagtao nin malinaw, eksakto, asin napapanahon na impormasyon dapit sa sektor nin enerhiya, kasabay kan pangapudan sa publiko na magsarig sana sa mga opisyal na report asin beripikado na datos.
Katakod kaini, nangapudan man si Secretary Gomez sa mga netizens na magin responsable sa paghiras nin impormasyon asin siguraduhon na beripikado ini bago ipaabot tanganing maibitaran an posibleng danyos sa publiko.
