NAGA CITY– Gadan an saro katao mantang irido an apat na iba pa sa salpukan kan duwang truck sa Maharlika Highway, Barangay Sigamot, Libmanan, Camarines Sur.
Binisto an nagadan na si Robert Steve Barbante, 29-anyos, driver kan elf truck mantang irido an driver kan truck na si Alfie Rapsing, 32-anyos kaiba an mga pasahero na sinda Gino Arandela, 23-anyos, Jerry Arandela, 46-anyos asin Eleonor Arandela, 48-anyos.
Sa nakuang impormasyon kan Bombo Radyo Naga napag-araman na pigbabagtas kan truck na minamaneho ni Rapsing an tinampong sakop kan nasambitan ng lugar kan bigla kaining kakanon an linya kan kasabatang elf truck sa pakurbang parte kan highway na nagin kawsa kan banggaan kan duwang lunadan.
Katakod kaini, nairido an duwang driver kaiba an tolong pasahero na pigdalagan sa ospital alagad pigdeklarang dead on arrival si Barbante.
Sa ngunyan nagpapadagos pa an imbestigasyon kan mga otoridad dapit sa nasambitan ng insidente.
