NAGA CITY- Gadan an sarong persona mantang nakasalbar man an sarong lolo makalihis na marumpagan nin nagrasay na daga an saindang harong sa Sagñay, Camarines Sur.
Binisto an nagadan na si Ryan Lasmariñas mantang nakasalbar man si Felipe Olaño, 85-anyos.
Sa entrevista kan Bombo Radyo Naga ki SPO1 Dave John De Quiros hale sa PNP Sagñay, sinaysay kaini na nagtuturog suboot an duwang biktima sa laog kan saindang harong sa barangay Sibaguan kan bigla na sana ining marumpagan nin daga, alas-3:20 nin mag-uumagahon subago.
Maswerteng nakadalagan suboot paluwas kan saindang harong si Olaño mantang dae man pinalad si Lasmariñas na nagresulta sa saiyang kagadanan.
Huli sa pangyayari, partially damage ngonyan an nasambitang harong na pagsasadiri ni Olaño.
Sa ngonyan, nagpapadagos pa suboot an pigkokondusir na clearing operations kan mga kabuhan kan nagkapirang ahensya kan gobyerno sa nasambitang lugar makalihis an pangyayari.
