NAGA CITY- Nag-negatibo suboot sa dawa anong substance nin iligal na droga an sarong sachet nin pigtutubudang cocaine na narekober kan sarong parasira sa kadagatang sakop kan Gumaca, Quezon.
Sa impormasyong ipinadara sa Bombo Radyo Naga ni PC/Insp. Marcelito Platino, tagapagtaram kan Quezon Police Provincial Office (QPPO), sinaysay kaini na basado sa resulta kan chemical analysis na pigkondusir sa saindang provincial crime laboratory, nagluluwas na negatibo suboot sa cocaine an narekober na pigkakarkulong 40 grams nin pigtutubudang iligal na droga na maabot suboot sa kantidad sa P300,000.
Dae man pighahale kan PNP an posibilidad na nakaapektar sa resulta kan eksaminasyon kan crime laboratory an nakalaog na tubig sa nasambitang sachet kaya man nakontaminar na an substance na laog kaini.
Sa ibong kaini, nilalaoman man kan QPPO na igwa pang mga makukuang iligal na droga sa kadagatang sakop kan Quezon sa mga masurunod na aldaw kaya man padagos pa nanggad an saindang pinahigot na pagbabantay sa mga coastal areas siring man an pakikipagkoordinar sa mga parasira.
