NAGA CITY– Nakabwelta na sa Laguna Provincial Jail an saro sa anom na presong nagdulag sa nasambitan ngpasilidad kan nakaaging semana.
Sa nagunong impormasyon kan Bombo Radyo Naga gikan ki Rommel Palacol, head kan Laguna Action Center, napag-araman na nagpadara nin surrender feelers an puganteng si Verjust Dizon alyas Der, 36-anyos sa hepe kan Sta. Maria-PNP makalihis an haros apat na aldaw na pagtatago gikan sa mga otoridad.
Mawot suboot ni Dizon na linigon an saiyang pangaran huli sa takot na maakusaran sa pambabadil sa prison guard na si Norberto Malabanan na dagos nang binawian nin buhay makalihis na badilon sa lalawgon kan saro sa mga pugante.
Basado pa sa impormasyon, nilinaw man ni Dizon na dai siya orihinal na kabale sa limang iba pang nagdulag na preso huli ta hinahalat niya sana an pagbista kan saiyang aki kan aldaw na mangyari an insidente.
Sinamantala sana suboot kaini an nangyaring kariribukan asin nagdulag sa paagi kan nakabuka na gate kan provincial jail.
Napag-araman na nagtago si Dizon sa banwaan kan Bocaue, Bulacan alagad nagdesisyong magsuko sa pinagkakatiwalaan na chief of police kan Sta. Maria-PNP.
May kaso si Dizon na pagbalgar sa Comprehensive Dangerous Drugs Act of 2002.
Marurumduman sa isinagibong operasyon sa Imus, Cavite, nadakop kan binilog na tracking team kan Laguna Police Provincial Office an duwa sa anom na puganteng sinda Rhandel Vale asin Romel Macaraig.
Sa ngunian, tolong escapee na sana an padagos pang hinahanap kan mga otoridad tanganing liwat maibwelta sa nasambitan ng pasilidad.
