Pigtawan-duon ni Senador Imee Marcos nag-alegar na an presenteng 13-miyembro kan mayoriya kan Senado an pigtututukan huli sa “case buildup” asin mga kasong pig-aandam laban sa sainda.
Segun ki Marcos, haloy na sindang nareresibi nin mga apod asin text message hale sa Ombudsman, Department of Justice (DOJ) asin National Bureau of Investigation (NBI) na nagsasabi na igwang case buildup na piggigibo kontra sa sainda asin igwa suboot nin mga nagtatao nin orden sa ahensya na dae na pinangaranan kan Senador.
Katakod kaini, tinawan nin duon ni Marcos na garo baga sunod-sunod na an mga kaso na pigtutubudang konektado sa saindang grupo asin lalo nang nagigin magabat.
Nabanggit kaini si Senador Rodante Marcoleta, Jinggoy Estrada, Joel Villanueva, Chiz Esudero asin an magturugang na sinda Senador Camille Villar asin Mark Villar bilang nagkapira sa mga soboot nahahampang o konektado sa mga reklamo.
Siring man, nahahampang si Senador Ronald “Bato” dela Rosa sa mandamiento de aresto hale sa International Criminal Court huli sa suboot pagkaimbwelto sa war on drugs kan administrasyon ni dating Presidente Rodrigo Duterte.
Si Senador Bong Go, sabi niya, posible man na atubangon an kaparehong kaso makalihis na nginaranan na co-perpetrators ni Duterte.
Sigon ki Marcos, dae niya aram kun pigpupulitika o pinipirit an saindang grupo.
Huli kaini, pigkwestyon man ni Marcos kun tano ta mas grabe daa an tensyon asin iriwal sa senado ngonian kumpara sa nakaaging pagbabago kan liderato.
Sinabi pa kaini na kan madaog an saindang grupo sa nakaaging leadership change kun sain yaon sa pwesto si dating Presidente kan Senado na si Vicente “Tito” Sotto III, dae sinda nagreklamo dawa dae ninda ini sinusuportaran.
Sinabi kan senadora na naglalaom siya na dae na madagos an anuman na soboot “persecution” kontra sa saindang grupo, lalo na sa tahaw kan problemang inaatubang kan nasyon.
