Binweltahan ni dating Senador Franklin Drilon an suboot kawaran nin kontrol ni Senate President Alan Peter Cayetano sa halangkaw na katiripunan nin Kongreso makalihis an mga nangyari digdi sa laog sana nin maabot na sa ikaapat na semana.
Sa naging pahayag kan dating senate president, inapod niya si Cayetano na ‘hading mayong kahadean’ o ‘king without a kingdom’ makalihis suboot ining mawaran nin kontrol sa barangaan sa Senado.
Katakod ini kan nangyaring deadlock sa nasambitang Kamara kun sain parehong yaon na ngunyan sa 11 an bilang kan mga miyembro nin Mayorya asin Minority bloc makalihis an pagkakaaresto kay Sen. Jinggoy Estrada nin huli sa kasong plunder.
Enot nang nabawasan an miyembro kan Majority bloc kan mawara sa presensya si Sen. Ronald “Bato” Dela Rosa makalihis ining mapabaretang maghali sa ‘protective custody’ nin Senate premises kan maagahon nin Huwebes, Mayo 14, asin ta nganing suboot iwasan an arrest warrant hali sa International Criminal Court (ICC).
Saro ini sa suboot pagkakahadit kan grupo nin huli ta igwa pang nagkapirang miyembro kan mayorya an namemeligrong dai makaatendir sa mga sesyon kan Senado, partikularmente sa impeachment trial kontra kay Vice President Sara Duterte-Carpio.
Marurumdumang naging mainiton an nasambitang urulayan kan magsangat nin propuwesto si Senador Rodante Marcoleta na nagtutugot sa nagkapirang miyembro na magpartisipar sa mga urulayan sa Senado asin magboto sa paagi kang videoconferencing. Bagay ini na dai pigtugutan asin pigdiskusyunan kan minorya, na kun sain pigtawan-doon man ni Senador Erwin Tulfo na pwede sana ining arog kaining lakdang kun igwang “national emergency” asin “force majeure.”
Kan magdiretso si Cayetano sa saiyang mosyon na magborotohan para sa desisyon ninda manungod sa nasambitang propuwesto, digdi na nag-walkoout an kadaklan nin Minority bloc nin huli suboot sa dai pagtugot sainda na palawigon an mga diskusyon asin paghihidali na maipasar an nasambitang lakdang.
Mientrastanto, nagpahayag man an presenteng presidente kan Senado na preparado siyang magtaong-dalan sa bagong maribay sa saiya sa puwesto alagad dapat ngunang magpahiling saiya an minorya nin 13 pirma, katumbas kan mga numero na nagpaggana saiya sa posisyon.
