15 mga kahaharongan sa CamSur ginaba kan storm surge ana epekto kan habagat; haros 60 katao apektado

NAGA CITY– Maabot sa 60 mga indibidwal an apektado ngunyan makalihis na anodon kan storm surge an mga kahaharongan harani sa baybayon kan Barangay San Cirilo, Pasacao, Camarines Sur.

Sa impormasyong pigtoon ni Edmer Miravalles, head kan Municipal Disaster Risk Reduction and Management Office (MDRRMO) Pasacao, sinaysay kaini na basado sa report kan Barangay Disaster Risk Reduction and Management Council kan nasambitan nang Barangay, maabot sa 15 mga harong an nagaba sa storm surge huli sa epekto kan Habagat.

Apektado kaini an maabot sa 15 mga pamilya na nakaistar sa mga harong na gibo sa mga light materials.

Sa ngunyan nagpaabot na nin tabang an lokal na gobyerno kan Pasacao sa mga apektadong pamilya.