Pigkumpirmar kan Department of Justice na igwang 15 personahes kan Philippine National Police an nasa irarom ngunyan kan ‘restrictive custody’ mapadapit sa kaso kan mga nawawarang sabungero.
Sigun mismo ki Justice Secretary Remulla, an mga pulis na ini an pigsairarom sa nasambitan ng restriksiyon tanganing dae makapangulog pa.
Paliwanag kaya kaini na an 15 personahes kan Pambansang Pulisya an imbwelto soboot sa paggadan kan mga biktimang sabungero na hasta ngunyan, dae pa man giraray nahahanap.
Kaya saiyang pigsierto an padagos na pag-iimbestigar kan ahensiya kasabay kan pagsiertong dae sinda ma-untok hasta mayong naisisirbing hustisya orog na para sa mga kaparientrd kan mga sabungero.
Mantang katakod man sa kapot nindang testigo na si alyas ‘totoy’ o Julie ‘Dondon’ Patidongan ipigheras ni Department of Justice Secretary Jesus Crispin Remulla na ini an nasa pangangataman na kan Philippine National Police.
Igwa na soboot sindang koneksiyon ni PNP Chief General Nicolas Torre III sa pagprotejir ki Alyas Totoy orog na sa kasalbaduhan kan saiyang buhay.
Si Alyas Totoy an naglantaf na testigong nagbuyagyag kan mga alegasyon kontra kina Charlie ‘Atong’ Ang asin aktres na si Gretchen Barreto.
Alagad maduon man na pinahimutikan kan kampo ni Atong Ang asin pigtawan-duon pang mayong kredibilidad o basehan an mga paratang ni alyas Totoy mapadapit sa saiya.
Kaya bunsod kan mga ribayan na ini sa magkaibong na kampo, pighurot ni Justice Secretary Remulla na makasisierto soboot an publiko na maisisirbe an hustisya.
Saiya man na pagsierto na dae soboot maapektaran o mababahiran kan kwarta an saindang pigsasagibong imbestigasyon tanganing matukoy sana an katotoohan.
Huli digde, an kaparientas man kan mga nawawarang sabungero, liwat nakakahiling nin paglaom mapadapit sa pag-abot ninda kan hustisyang haloy ng pig-aasam.
Sigun ki Janice Esplana, tiyaon kan saro sa mga biktima, an mga panibagong report an saiyang ikinaogma huli man ta kaidto pa haros mayo na sindang nadadangog na pag-usad mapadapit sa kaso.
Kaya kan naglantad an nagpabistadong testigos, nagkaigwa liwat sinda nin paglaom na makua an hustisya sa orog na marekas na panahon.
