Aram baya nindo mga ka-Bombo, sigun ki Ian Wright, an State Public Archaeologist kan Utah, an bote an kaibahan sa ribu-ribong artifact na gikan pa kan nakalihis na poco mas o menos 1870 hasta 1890 na nanutaran sa dagang pagsasadiri kan U.S. Forest Service na piggamit kan Alta Ski resort.
Sinaysay ni Wright na an nanutaran an primerong bilog asin boteng igwang laog na arak gikan sa panahong idto na nanutaran sa lugar.
Naghagad nin tabang an grupo ni Wright sa High West, an pinakagurang na legal na distillery sa Utah tanganing surion an laman kan bote. Nagtao man an kataid na Old Town Cellars nin sarong Coravin device tanganing makakua nin kadikit na likido na dae nasasarado an cork.
Si Isaac Winter, director kan distilling sa High West, an primerong nagtana kan laog kan bote. Sigun sa saiya, an lasa kaini an kalasa kan “prutas, igwang kadikit na lasa kan ubak, asin risang haloy na man na nakaimbak.
Sinaysay man ni Tara Lindley, director of sensory and product development sa High West, na masalimuot an lasa kaini.
Sigun sa mga eksperto, an laog kan bote an garo beer na igwang hababang alcohol content, asin bakong matapang na arak.
Naglalaom ngunyan an mga mananaliksik na liwat magibo an nasambitan ng inumon.
Dugang pa ni Winter na sa pinakairarom kan bote, medyo malabo soboot asin garo gatas an itsura kan laog. Dadarahon man ini asin poporbarang magkua nin yeast na pwede pang magamit.
