NAGA CITY- Irido an 16 persona makalihis na magtagilid an saindang nilulunadang pampasaherong bus sa parte kan Tagkawayan, Quezon.
Sa entrevista kan Bombo Radyo Naga ki PO2 Adrian Gregory, hale sa PNP Tagkawayan, sinaysay kaini na binabagtas kan pampasaherong Philtranco bus na minamaneho ni Phillip Balleber, 32-anyos an kalabaan kan tinampo sa barangay Sta. Cecilia kan mawaran suboot nin preno an nasambitang bihikulo.
Sigon ki Gregory, pinirit pa ni Balleber na maibwelta an bus sa tahaw kan tinampo para dae ini mahulog sa ampas na nagresulta sa pagtagilid kaini.
Tulos man na pigdalagan sa ospital an 14 pasahero asin duwang driver kan bus makalihis na magsapo nin lugad sa saindang lawas.
Napag-araman na pasiring kuta na sa rehiyong Bicol an nasambitang bus kan mangyari an aksidente.
Marurumduman na dae pa nahahaloy kan magkarambola man an tolong pampasaherong bus sa barangay San Francisco sa parehong banwaan kun saen 25 mga pasahero an nairido.
