Pig apod na “joke” ni Senadora Pia Cayetano an plano kan Philippine Health Insurance Corporation (PhilHealth) na sulamenteng 18% sana nin gastuson sa ospital an sisimbagon kan state health insurer para sa mga miyembro kaini sa taong 2025.
Sigun pa ki Cayetano, taliwas ini sa obheto kan Universal Health Care (UHC) Law na magtao nin nin bastante asin baratong serbisyong pangsalud sa gabos nin Pilipino sa paagi man kan PhilHealth.
Sa pigkundusir na oral arguments kansuarin sana sa Korte Suprema manungod sa pagbalyo kan sobrang pondo kan PhilHealth sa national treasury, pigbuyagyag ni PhilHealth Senior Vice President Renato Limsiaco, Jr. na target kan PhilHealth na akuon an nasa 18% ng gastuson sa ospital sa 2025, asin man pinaglalaomang malangkaw ini sa 28% pag abot kan taong 2028.
Hurot pa kan Senadora, pano makakatabang an siring na klaseng coverage sa mga pamilyang Pilipino, orog na sa mga kapos sa buhay asin nasa lower-income bracket.
Gikan 2014 hasta 2024, labi sa PHP 534 bilyon an naresiber na pondo kan PhilHealth gikan man sa sin tax revenues — kaya man orog na bakong makatwiran na 18% sana an an saiyang sagutin kan ahensya para sa mga pasyente.
Pig-inkaminar ni Cayetano an PhilHealth na liwat na pag-adalan an saindang coverage targets asin man siertuhon na nakahanay ini sa obheto kan UHC Law — na matawan nin bastanteng serbisyong pangsalud an gabos nin Pilipino, ano man an estado sa buhay, tangani dae sinda malubog sa mga gastuson.
